Gaur egungo industriak eta zerbitzuek orain arte ez bezalako ezagutza eta lan egiteko modua behar dutenez, Plaiaundin irakaskuntza-ikaskuntza prozesua funtzionatzeko modu berri horretara egokitu dugu, azken batean, industriara eta horrek eskatzen dituen balioetara.

Gure ikastetxean, ETHAZI irakaskuntza eredua garatzen da. Ikaskuntza- eredu honen helburua ikasleak beren ikaskuntzaren protagonista izatea da, pentsamendu sortzailea eta berritzailea landuz.

Irakasleek egoera problematikoak (erronkak) aurkezten dizkiete ikasleei, eta egoera horiek ahalik eta errealenak izaten dira, enpresaren mundura egokituta. Etorkizunean lantokian aurki ditzaketen gaiak dira eta irtenbidea eman behar diete.

Ikasleek ondo ulertu behar dute egoera, aztertu egin behar dute eta hura konpontzeko behar duten informazioa jaso eta analizatu behar dute. Azkenik, erronka horri irtenbidea eman behar diote. Horrela, ziklo bakoitzeko gaitasun tekniko eta espezifikoak garatzen dira, bai eta izaera estrategikoa duten zeharkako gaitasunak ere, hala nola: ikasteko autonomia, talde-lana, ezohiko emaitzak lortzea, eta abar, ezinbestekoak baitira beraien etorkizun profesionalerako.