Prozesu onkologikoan zehar plateretik zaintzen ikasteko tailer praktikoa
Plaiaundi LHII, Irun – 2025eko maiatzaren 8ª – Gaur Plaiaundi LHIIn nutrizio- eta sukaldaritza-tailerra egin da prozesu onkologikoan dauden pertsonei eta haien senideei zuzenduta, ONkologia 360º berrikuntza-proiektuaren esparruan. Jardunaldiak prestakuntza-edukiak eta sukaldaritzako erakustaldi praktikoak uztartu ditu, eta bertaratuek oso balorazio positiboa egin dute.
Saioa Unai Etxebeste, Plaiaundiko Berrikuntza Zuzendariaren harrera-hitzekin hasi da. Ondoren, Aitor Gaztelumendi Dietetikako irakasleak eta proiektuaren ikertzaileetako batek ONkologia 360º proiektuaren helburuak azaldu ditu: minbizia duten pertsonen bizi-kalitatea diziplina anitzeko ikuspegi batetik hobetzea du helburu ekimen horrek, Lanbide Heziketako hainbat ziklo inplikatuz.
Prestakuntza-blokearen buru Garbiñe Aizpurua Donostialdeko ESIko nutrizionista izan da, eta tratamendu onkologikoan elikadura egokitzeko funtsezko gomendioak partekatu ditu. Bere ekarpenen artean, minbizia duten pazienteentzat egokitutako “Harvardeko plater osasungarriaren” ereduaren erabilgarritasuna nabarmendu du, janari bakoitzean fruta eta barazkiak, zerealak eta elikagai proteikoak proportzio orekatuetan txertatuz. Gosarian barazkiak sartzea ere proposatu du, aukera baliozko eta osasungarri gisa, eta azpimarratu du mokadu bakoitzak ahalik eta elikadura-dentsitate handiena eman behar duela. Jateko gogorik ez dagoenean, ez da irenstea behartzea, gosea pizteko estrategiak aplikatzea baizik.
Alde praktikoa Cebanc Ostalaritza eta Sukaldaritza Eskolako hiru sukaldarik egin dute, eta bi plater egokitu egin dituzte: boloñesar erara prestatutako pasta testurizatu bat, disfagia duten pertsonentzat pentsatua, eta sagar konpotaz egindako flana, postre leun, elikagarri eta digestio errazekoaren adibide gisa.
Bertaratuen artean erabiltzaile batzuk, senideak eta Plaiaundiko Dietetikako ikasleak izan dira. Ikasleek interesa handiz jarraitu dute saioa, ikuspegi bikoitzetik: prestakuntza teknikoa eta esperientzia pertsonal baliotsua. Giro hurbila eta parte-hartzailea izan da, eta onkologian elikaduraren garrantziari buruzko hausnarketa bultzatu du.
ONkologia 360º Eusko Jaurlaritzako Lanbide Heziketako Sailburuordetzak bultzatutako berrikuntza-proiektua da, eta Plaiaundi LHII, Monte Albertia LHII, Inmakulada Lanbide Ikastola eta ESCIVI ikastetxeen arteko lankidetzan ari da garatzen. Oraingo honetan, Osakidetza eta Cebanc Ostalaritza Eskola izan dira kolaboratzaileak.
📷 Tailerraren argazkiak erantsita daude. Informazio gehiagorako edo elkarrizketak eskatzeko:
📩 agaztelumendi@plaiaundi.com
